بمناسبة الاجازة تدوينة طويلة جداا باللهجة العامية القووح
من الشرقية أحدثكم
قدر الله علي وصارت عندي دورة في الشرقية ،، عاد الحين من الشرقية احاتسيكم << طراه يقولها لياه ينسى لهجته تعرفون اسبوع كامل وانا مغير حتسين بطيء تقول تسن ما وراي نوم ولا وراي روحتن للراشد والا السباحه ،، ما علينا لهجتكم يا اهل الشرقية وانتم حريين فيها ..
على طاري اللهجة لحقني ولدين قلت شكلهم متاكدين اني من الرياض وقاعدين يلاحقوني يسمعوني اللهجه 
طبعا استمع بلذة لأي لهجة الا اللهجة القصيمية لانها محومة تسبدي في الدوام من كثرها. عاد فيه واحد ناشب لي كل ذاك الاسبوع وهو يقول جدد جوازك عشان ننقز للكويت وانا اللي احمسه الين بغى يستاجر عن طريق النت يوم جاء الصز ولاني ما بعد جددت جوازي :d ساد من قال للكويت ما يخلونا ندخل بالبطاقه << طراه انه ما يبي يختم على جوازه ولا ختم يبيه يلق بياض .
انطلقت على بركة الله وحفظه بقرنبعتي الجديده اللي فيها هرن مثل الجموس << شفتوا اثروا علي في اللهجه 
، يوم الجمعه حول الساعه ست ونص ولاني شاري سيديين عبدالمحسن الاحمد وسيدي سلمان العوده بانسبه معهم الين اوصل ،، وياليتني ما سمعت محاضرة الاحمد ضيق صدري خرب سمعته عندي ،، مدري زاد عنده الطوع والا وش السالفه .. الله يهديه بس 
وسلمان العوده اللي خربها حتى الجهاد معد يسميه جهاد صار يسميه اوقات الحروب خخخخخخخخخ.
وصلت الساعه عشر ونص منيب عجل على راحتي ،، يومني وصلت وانا اللي اطلع كروكي الفندق واقعد افتر وافتر وافتر الين الساعه 12 لكن لقيته اشوا ،، عاد انا مسوي بحث قبل ولاقي ان سعر الغرف عندهم باربعميه وخمسين وانا منيب قاعد اكبكب فلوسي على الفاضي ،، ورانا تقسيط وورانا عزيمة << خخخخخخخخ :p
يومني لقيت الفندق اللي فيه دورتنا ولاني خادر ما فيني حيل ارص البنزيم قلت ما لك الا الثقبه معشش العزوبيين وانا اللي اشوف اسهل طريق من الثقبه لين الفندق وانا اللي احفظ دربي زين عشان ما اتوهق الصبح ..
وكل ما وقفت عند شقق مفروشه قال ما فيه عزوبيه :| ولدززز الى الحين فيه هذا التخلف المشكله اقول لهم والله اني لحييلي واحب الهواجيس باقعد على البحر الين يطلع الفجر منيب جاي لكم ابد :$ بس انهم ما يوحون ،، المشكله الحين ما نقول ان حيحي الرياض جايين عشان يسوون هالمشاكل وما اعتقد ان فيه نظام حالي يقول افصلوا بين العزوبي والعوائل في السكن ،، يا جماعه لنفرض اني متزوج بس منيب ماخذها معي اقعد في الشارع يعني ؟؟ يمكن فريت ست شقق مفروشه كلهم يقولون ان ما فيه شقق للعزاب ،، ولقيت بنقالي قاعد في محل يسميه شقق مفروشه شابك السماعات والنت وشكله داخل بال توك لاني يوم طليت عليه مار يختبص خخخخخخخخ ،، والغرفه اللي عنده والعياذ بالله تقول كرتون فيري مدحين فيه حبحر يبون ييبسونه ! يعني حتى الكنبل اللي فيها يوم دخلت عليه قال تكفى واللي يرحم اهلك كلهم اسحبني معك ابي اشم هواء ولو انها رطوبه هههههههه
المهم اني يئست قلت شكل ما لك الا تفرش فرشتك في الكورنيش والا العزيزية وتخمد الين يزقزق النورس، خبركم ما عندهم عصافير وحمام قميري خخخخخخ ، قلت ان ما لقيت عند اخر محل شقق فانا باصير كني راعي تريله اقرب ردمية وانوم.
دخلت ولاه سوداني سلمت عليه وانا مبتسم وومسوي نفسي مروق وما فيني النوم ولاشي وطبيت في عينه على طول : وش اللي مسهرك ؟ << خخخخخخ طراه انا سهار ، قلت عندك شقه قال اييه قلت ابي اشوفها عاد تعرفون سوداني ما فيه امل يتحرك عطاني المفتاح وقال شفها اول غرفة على اليمين رحت وناظرتها ولاها اشوا حليوه ونظيفه اقل شي ، رجعت له قال ترا هذي النمونه عاد اللي بتسكن فيها فوق خخخخخ جاي اخطب انا قاعد يوريني النمونه :$ وبعد ما فاصلته على السعر واني باقعد اسبوع باغثكم كل يوم ورضيت بالسعر قلت يله سجل قال عطني بطاقة العائلة ؟؟ افا حتى انت يالزول تشك في اخلاقي يجي منك اكثر يا هيوانه قلت انا لحالي وشفني جاي لدورة في المعيبد قسم انك ما راح تشوفني الا شوي بس قال ياخي الحن ما نسكن عزابيين ويسحب المنديل وتهل عبيريته الضعيف رحمته انا قلت له ترا ان كان فيه احراج عليك قلي وانا اسحب نفسي واللي في بطني اذبه عند اقرب مسجد قال لااااااا كل شي الا ضنايه انا حربيه ايوه حاعرف اربيه قلت له طيب شف لي حل خلني اسكن فيذا الين يجي يوم الولاده قال بس ما يجي معك احد ولا اشوف مدخلن احد قلت له جغجغ سيفين ونخله حتى انت منتاب شايفني كانك تداوم في الليل قال هات يدك عشان البسك الخاتم وانا اللي استحي واطل مع الباب عشان ادور شهود <<< خخخخخخخ يا ملغي
المهم اشوا رضا وسكنني بس دفعت له مقدم عن خمسة ايام صدق الفلوس تغير النفوس، وانا اللي ادخل واخذ لي دش وانجطل على السرير .
السبت 6/6/2009م
قمت الساعه ست تقريبا، متحمس واقعد منتبص على الكنب الين شترت واطلع سبع واوصل سبع وعشر يععععع وشذا الشرقيه ما فيها زحمه ابدن ابدن ابدن حسيت اني امشي لحالي حتى اني يوم وصلت للفندق ما صدقت ابد قلت شكلي جاي مع طريق غير يعني تخيل انك حاسبها في مخك نص ساعه مشوار مع الزحمه ومع المشي بالهون ما وراك شي طالع مبكر تتفاجا في لحظه ان المشوار كله عشر دقايق ياخي صدق الناس معد يستحون.
عاد عند باب الفندق صارت المفاجاه انا نويت ادخل سيارتي في المواقف الداخليه للفندق ولا عند بابهم المسامير اللي اذا وطيتها نزلت ( انا حسبتها كذا ) وانا مفهي واناظر الفندق هو ذا بابنا او لا وانا اللي ارقى على المسامير باذن الله بالهون عشان ما يحك موتري واسمع صوت طقطقه قلت افا حك الصدام يبي من يدعس شوي عشان ارقها وذي ان شاء الله ما تضر الصدام ،، وصارت المفاجاه ان السياره ما طاعت تمشي قلت اييه يالكورلا وين ايامتس تقطعين الفيافي والاراضي القفار وذي حتى حديده عجزت ترقاها ، ولا حارس الامن يوقفني وانا اللي احول ولاها اوب مسامير تنزل اثرها مسامير مع الجهتين كنها شوكة معفطها بزر وشقت الجلبه اللي تحت الصدام بس اشوا الصدام ما جاه شي جاء الحارس بيسحب المسامير ولاها داخله قلت له اصبر اصبر خل بارفعها ليا ذا المسامير تشق الصدام وانا اللي انزل العفريته وارفع الموتر شوي ويسحبها وقال ترا اوب انت لحالك فيه ثلاثة قبلك تو كلهم نفس مشكلتك . طبعا بغيت العنه وكذا بس ذكرت الكورلا انها ما قد ضرها شي .
دخلت الفندق ويقابلني ذاك الهندي قلت وين فصلي فيه ؟ قال هاه < بس بالهندي خخخ ، قلت I have training today. Which room or class is mine?
قال وانت طيب << الى الحين بالهندي ،، اشر لي على الريسبشن ولا فيه لبناني قال شو بئدر ئخدمك ؟. قلت عندي دورة ونسيت الفوط الصحية في الرياض وين اقرب بقاله خخخخخخخ لا لا قلت وين القاعه لو سمحت ؟ على فكره كل من اتصل علي وقلت له عندي دورة قال افا متى بتخلص وترجع نفسيتك هو وش يصير مثلا ؟؟ << بريء خخخخخخخ ،، قال اللبناني شوف اللوحة هونيك بتحصل كل الدورات اللي بتئعد اليوم . قلت ميرسي بيكو << نسيت ان بيكو مغربيه اوب لبنانيه خخخخ . والقى فصلي والقى ذاك الفلسطيني اللي قاعد يوزع اوراق على الكراسي ويوزع الاسامي وانا اللي اشوف اسمي :$ وتتفتق اساريري :$ حسيت اني اعرفني :$ وه يا زينك يا اسمي بكل خطوط اللغة العربية :$ يهبببل <<< ههههههههه وش تبي ، سلمت على المدرب وقلت له اسمي قالي انت اول واحد يدخل علي بغيت اقول له مجرب انت من قبل الدخله وكذا :$ << رامز غض الطرف ياخي هههههههه . قال عشان كذا راح اخيرك المكان اللي تبي تجلس فيه ، قلت جنبك وانا اقدر على بعدك حبيبي :$ .
قال اخزمها وشف الشاهي فيذاك خابرك تحب الشاهي تقحن الين اقول يله بنبدا << باللهجة الفلسطينيه طبعا . وانا اللي اتبستن على الشاهي والكروسونات خخخخ خلصته قبل ما يجي ولا واحد .
دخل زميل لي في الدورة تعرفنا على بعض معرفة سطحية :$ بعدين دخل واحد من شكله انه بدوي وانا اللي اناظر الاسامي بسرعه ما فيها اسم بدوي ياااخي ..
الا ما تقولون الله ينعن البدو. اول شي قاله بعد السلام قال يا شباب نبي نكلم المدرس عشان يطلعنا مبكرين ورانا البحرين :( .. ما اقول الا الله ينعن مديرك اللي وافق لك على هالدورة حدك الشفا او النسيم ويتكبكب عليك .. يعني الحين ما بعد عرفت وش بندرس يمكن اللي ندرسه شي صعب ويحتاج تمارين ويحتاج وقت وذا جاي يقول تكفون خلونا نتفق تطلع الساعه 12 مع ان نهاية التدريب الساعه 3 العصر . والله ياهم يفشلون وبس .
وكان اليوم الاول تقريبا تعارف وكل واحد يتكلم عن نفسه ودوامه ومهامه الوظيفية وحالتة الاجتماعية وكان يستغلها المدرب ليعطينا مبادئ عن المنهج بشكل واسلوب جميل وحواري ويقتعك من خلال تجارب غيرنا باللي يبي يوصله اخر الدوره وقدر انه يفهمنا تقريبا من بداية اول يوم . على كل الدورة مضبوطة مرره وما خربها الا شيئين اولها البدوي الله يستر عليه ويصلحه ويضيع جوازه عشان يمنع من السفر للبحرين لانه بعد يوم او كذا قال انه مستاجر شقه في البحرين يروح يفلها هناك ويجينا مواصل .. كان فيها واحد من سدير وثلاثة من الرياض وواحد من الخرج وواحد من السر وواحد من جده وواحد من الصومال وواحد من نجران واثنين من الشرقية واحد من القصيم . كم صرنا الحين ؟؟ لازم نصير ثلاثطعش . طبعا انا قلت الاصل والا فيه ناس من الرياض وناس من الشرقية وواحد من جده بس
بعد ما تغدينا رجعت ونمت الى الساعه خمس وانا اللي اطلع واقول وين اروح وين اروح ؟ اخاف اروح للكورنيش يجون ناس مثل يزيد ويقول وشذا الموسوس خخخخخخخخ والبحر ما لي خلقه اسبح ،، مار اني اذكر ان ناصر ولد خالي قايل لي ان فيه شي زين على الكورنيش بس ما يدري وشو يقول انه جنب تشيليز وذيك الخرابيط ،، قلت ما بدهاش رح شف وشو هالزين ؟ وانا اللي ادور على الكورنيش ولا كله مطاعم واشوف سايتك ( مركز الامير سلطان للمعرفه ) قلت تهقى ان ناصر بيهوقني مع طويلين العمر ؟؟ يومني شفت بوابة الزوار والباب مفتوح قلت بس مابدهاش شف وش بيقولون لك . وانا اللي ادخل ومحد حاتساني ولا شي والا على الكاونتر فيه اثنين قاعدين ومكتوب التذاكر رحت لهم وسلمت عليهم قلت انا من الرياض ولا ادري وش انتم ولا وش تقدمون انا دخلت لاني شفت باب الزوار قلت اكيد انهم يستقبلوني وش عندكم ؟ ولا فيها واحد رهيييب مرره شرح لي كل شي ثمين قال وش تبي قلت انت شر علي وش ازين وانا وراك ، قال ابد عطني اربعين ريال وانا اسنعك .. بغيت اقول فيه جاكوزي خخخخخخخ ، دخلت وتمشيت فيه ولااه يبي بزران والا واحد فاضي يقعد يسمع بس كان عندهم احواض سمك فيها الوان واشكال وكان فيه جهاز يطلع لك اصوات الدلافين والحوتات << الله من زين الجمع خخخ .. ممتاز حسيت اني ماوكلي البحار :$ طبعا كان المركز مليان من اهل الشيعه نساء ورجال جايين بتوبيسين انا شايفهم في المواقف << قل قسم . وشكلهم من البحرين لان لكنتهم ثقيييله مرره غير الشرقيه وخشومهم كبار تقدر تدخل فشقة شوزن بالراحه .
اذن المغرب ونزلت اصلي ويصلي بنا واحد ما شاء الله صوته روعه ، واروح عاد للقبه العلمية يعرضون فيها فيلم وثائقي عن قمة ايفرست بطريقة ايماكس او ثنائية الابعاد .. وكانت تذكرتي تسمح بشوفة فيلم واحد مع انه يعرض اربع افلام كل يوم ، عن ايفرست وعن القرش وعن اجمل اماكن العالم وعن الطريق الى مكه ( اظن ) . عند الباب قال الحارس الله يعينك زحمه اليوم ! وانا اصلا ما فرقت معي لانه اول مره ادخل ،، يوم دخلت ولا كل الجماعه اللي تو حقين التوبيسين منتبصين فوق وانواع الصجة على بطيء خخخخ تقول شريط قديم وانسحب من بكرة المسجل خخخخخخخ يعني انت تدري ان فيه صجه بس يدخل الكلام مع بعض يعني وحده تقول ســـــــووووووووســــــــــــن وتسمع صوت ثاني يقول شوووووووف ميييين يرجع الصوت الاول وييييييين اختتتت يرجع الصوت الثاني ياااااااااالس قد ، ثمين تشتبك النهاية فجاه تتتتجااااام << يعني اختج وقدام نهايتها مع بعض خخخخخ .
جلست في النص وبدا العرض اول شي يعرفنا على نظام ايماكس وهي مدعومه من ياهو مدري وش دخلها ، قعدت اضحك لان كان يشرحون طريقة الصوت وكان اللي يتكلم يبي يوريك السماعات وينها وكل شوي يقول ستجدني هنا يولعون على السماعه اللي قدام ثمين يقول وتجدني هنا ثمين يولعون على السماعه اللي قدام علي اليمين وثمين يقول وسافاجاك باني هنا ويولعون السماعه اللي وراء على اليمين وتشوف هالرووس مغير تلاحقه يمكن فيه ست سماعات وسماعه كبيره للمؤثرات ، شي صراحه . عطونا عرض عن الفيلم اللي بعد هذا حق اسماك القرش وكان رهييب ثمين بدو عرض فيلم قمة ايفرست ،، من قوة الحماس كنتا تتلفت تناظر فوق كن الضلع فوق راسك ثمين وهم يورونك التصدعات كنك تطل عليه ،، مدري وشلون اشرحه لكن كان رهييب مرره واي واحد يروح للشرقية لازم يمر عليه . المهم يوم طلعت رجعت لخوينا اللي في الكاونتر وانا مبسوط قلت له شي اوب طبيعي يلزمني اشوف الفيلم اللي بعده قال هات عشرين لانك حجزت مبكر بس احرص انك تقعد فوق عشان تستمتع صدق . قلت ابشر خل باصلي واروح للقاعه اول واحد خخخ ..
وابشركم ابشركم مفتيين اخوانا الشيعه صاروا سمحين ويسروا لهم الدين ، صار الواحد يقدر يصلي على منديل اوب لازم حصاة . وشدراني ؟ هااااه هماني دخلت المصلى عشان اصلي العشاء ولا الصف الاخير كلهم من الجماعه يروكعون كل واحد لحاله هه انا كنت على نياتي قلت شكل ذولي يتسننون الين يذن خخخخخخ لاني يوم دخلت المصلى مار يذن ،، عاد يوم دققت مره ولا كل واحد وحصاته ،، قلت اييه بس وانا اللي اوقف في الصف الاول الين خلص مذن ويدخل اثنين من ربعنا واقام واحد منهم قلت بتصلون العشاء ناظرني بغى يقول انت سني خخخخخ وصلينا يوم خلصت ولاه باقي الدشير اللي من الشيعه اللي ما شالوا حصاهم معهم ودلوا يصفطون مناديل ويصلون عليها خخخخ ،، اتمنى يمر واحد شيعي من هنا ويجاوب على سؤالي : لماذا أهل الشيعة لا يعترفون بالجماعه ؟ يعني هناك ما يقارب 15 شخص يكفيهم ان يكونون جماعه ؟ أليست الجماعه أفضل ؟ ألا يوجد لديهم الغيرة بأن أهل السنة يصلون كجماعة متلاحمين وهم فرادى متفرقين ؟ ولديهم تصفيق على فخوذهم عند السجود والجلسه بين السجدتين ما فائدتها ؟
يوم طلعت ولا فيه وحده شيعية تناظرني ،، بغيت اغمز لها واقول تراني سمح كان لس خاطر زواج متعه والا شي اكلف ما علي اقردن السوداني حق الشقق يخلينا ندخل وما يقول شي خخخخخخخ ،، استغفر الله بس ..
واناظر الفيلم ومغير خمسطعش شخص بس ناظروه معي ،، طبعا كان ايفرست اطلق من القرش لان القرش قد شفت فيلم وثائقي احسن واكثر تفاصيل . يوم خلص رحت لخوينا قلت عطني كم برشور ان ما خليت كل اللي معي في التدريب بكره يجون ما اكون يوسف < وش عنده الواثق . ورجعت للشقه وانا اللي اخمد على طوول .
عشان ما تطوول مرره اكمل باقي الايام في التعليقات .
الاحد في الراشد والبطحاء حق الشرقية
الاثنين في البحرين وما ادراك ما البحرين
الثلاثاء عند خالي
الاربعاء كورنيش ارامكو وويحن للمترفين .
بررب
12 عدد التعليقات
