تعتريني الآن رغبة جامحة بأن أشتري سيجاراً وأدخنه ،، لا أعلم وحقيقة الأمر إن هذه الرغبة لأول مرة أشعر بها بالعادة كانت رغبة بالتدخين لمارلبورو أحمر بحكم إنني كنت سابقا مدخنا شرها لهذا الصنف ..
لكن لا أعلم لماذا سيجار؟ حتى إنني أتخيل منظري وأنا أنفخ الدخان ..
حسناً لقد رأيت أمي رحمها الله البارحه في المنام قبلت رأسها ويدها فرفعت عيني لآراها فإذا هي تنظر إلي وتبتسم ،
سأعتبره إشارة على موافقتها لأمر كنت أفكر فيه ظهر ذاك اليوم..
هل أشتري السيجار ؟ أقلها حتى أسترد روحي ..
بما اني ما احب الكورة ولا لي فيها علاقة لامن قريب بس لي علاقه فيها من بعيد لان اخوي نصراوي حتى الغرق << طراه اول وهم يقولون نصراوي حتى الموت. والحمدلله اني ما انتمي لرعاية الشباب لا من قريب ولا من بعيد والا كان فشيله يصير ذا مديري، ههههههههه تخيل يسالني احد وين تداوم اقول له في رعاية الشباب يعععععع
طبعا انا من زمان ما احب الرياضة الرجالية الجلفه << طراه انه ما يناظر الا كورة طائرة او جمباز او الغطس وكلهم نسائي 
ودي بعد جريدة الشرق الاوسط تخلي عالم الرياضه في ملحق لحاله مثل اول عشان ما تزيد الاوراق علينا .
مره من المرات سالوني في منتدى عن لو كنت رئيس رعاية الشباب ( الحمدلله ياربي انه اوب صدز الحمدلله الحمدلله ) قلت على طول بأقبلها لاحد الاتحادات الاوربية اللي تفتح النفس ،، عاد انا من زمان وانا ما احب هالانسان اللي مليان اخلاق سعودية اللي من عام 1998 وهو يمشي على خطط مدروسة ويعملون ليل ونهار.
احس انه بيطلع علي الحين وبيقول انت وش قاعد تسوي مغير تبربر فيذا والحن نشتغل ليل ونهار من زمان وانا ساكت عنك يبي من يربيكم ( الله لا يبلانا يا سموها ) . يوم قال اخلاق سعودية ذكرت محمد عبده يوم يقول النبي ( صلى الله عليه وسلم ) سعودي خخخخخخخخخ صدق لا قالو ما جمع الا فرق خخخخخخ وودي بعد انه بدال الرومي كان فؤاد انور عشان يهاوشه معد يقول الانجرتين بدال الارجنتين 
عمى عمره خمسين وما يعرف اسم اشهر ثالث دولة في كرة القدم
صراحة اول ما كنت اهتم باي شي له علاقة بالكره السعودية الا ان النصر يفوز عشان اخوي بس، لكن الحين جتني عن طريق الايميل نكت تفتح النفس وتخلي الواحد يتسدح من الضحك، ( واحد امه بتموت وهو قاعد فوق راسها يمه حلليني يمه حلليني ،، قالت لا ياوليدي منيب محللتك تبي سلطان ابن فهد يجي يهاوشني خخخخخخ ) وجتني الكثير من مقاطع للقاءات لهاالشخص اللي مدري وش شايف نفسه عليه، عشان كذا الله يرحمتس يا روحي عندتس حمير ما توحي << بالعادة تنقال للي عطس ومحد قاله يرحمك الله عشان الحمير اللي حوله ينتبهون عاد مد لي واقطع لك . والحن الحين في موسم المقاطعات ودي من الشعب السعودي الأبي صاحب الأخلاق السعودية انه يقاطع أي مباراه للمنتخب الى انا يقال رئيسها العام اللي ما ادري كم اتحاد رياضي ماسكه ،، والله يحفظ لنا البلوي يا ناس يا هوه خخخخخخخخخ.
كان بودي اني اسمع مع هالقرارات والتغيير الوزاري اللي صار صاحب السمو الملكي سلطان بن فهد بن عبدالعزيز اعفي من منصبه بناء على طلبه .
ثاني شي وانا اكتب هالمقال خايف انه يجيني مثل ما جاء خالد قهوجي بعد تدليعة اللسان المشهورة فودي اقترح على الملك كانه يسمعني :$ بما اننا في دولة حاميها حراميها (كمثال : نقلا عن احد الثقاة - << بغيت اقول نقلا عن مصدر مسئول خخخخ - بإن واحد من شرطة ثادق يبي يجيب عامل من الرياض الى ثادق لكن ما فيه طريقة لان العامل غير نظامي فطق خويه الانجليزي على صدره وقال انا اجيبه بكره وشلووون جابه؟؟ راح للرياض بالدورية وحمله من هناك وجابه وصار هذا العامل راع غنم صنف اول مهرب عن طريق الحكومة ) ودي ان المناصب الوزارية كلها تصير عند ناس اوب سموات عشان نقدر نطلع اللي في قلوبنا على راحتنا مثل ما حجروا لوزير المياه الين اغمى عليه وما نخاف يجونا أخوياء تالي الليول ،، بحكم ان حتى الروضات اللي في البر الحين صار عندها اثنين انجليز يحجزونها عشان مقعدة طويل العمر بيقعد فيها جعلها السرو .
وسلملي على بشير شنان بمناسبة عيد الحب وأهدي أغنية (انا ودي إذا ودك) لكل عاشق شايل معه ورده << ان بغى شايلها بيده او بقلبه اللي يريحه خخخخخ ،، والاغنية الثانية (غرك بنجمه ليه مالبسك تاج .،‘،.من عقب قصر يديك صارت طويله ) للثلاثي المرح تنفيسا ومشاركة لهم بمصيبتهم .
وعطني قوقل
وش عندك ما بعد طلعت بحثي 
هذي صور مصورتها الاستاذه /حنان وإستاذنتها إني أعرضها ووافقت ودك تقول لا عشان اقول لها حبتس ماجد عبدالله خخخخخخخخ
المهم تراها تقول ما اعرف اصور مع انها الفقاشه تعرف ترسم وتعرف تكتب وتعرف للفتششه من يوم صدت وهي تتعلم ما شاء الله ( اتحدا احد يعرف وش الفتششه )
اتفرجوا ماشاء الله
وخلصنا
حنان تراني حاط اسم مدونتي عشان اقول انها حصري على موقعي اخاف انتس ناشرتا في مكان ثاني فشلتني عندها صفحه في الفليكر تهئ تهئ <<
لجنة ولجة
اليوم الصباح رحت للدوام متأخر بحكم أن عندي وقت إضافي أقدر أعوض منه ،، ( الغمنده موب فيذا ) الغمنده إن الرادو في سيارتي محطوط على اذاعة الرياض وسبحان الله اول ما شغلت السيارة إشتغل الرادو ( أشهد أن لا إله إلا الله ) وكان فيه برنامج صباح الرياض والين استوعبت انها اذاعة الرياض كان فيه لقاء مع عقيد في مرور جدة ( << حسيت اني امشي في طريق المدينة اوب الامير خريص ) طبعا اول ما قال ان الضيف من جدة ذكرت نوال بخش، بتقولون وش جابها باقول اني بالعادة ما اسمع اذاعة الرياض الا اذا صرت رايح لثادق ( البلد ، الضيعه ، الئرية << طراه اني لبناني اترجم مسلسل مكسيكي ) ،، اييه واقولكم اني ما اسمعها الا يوم الخميس الظهر وانا في الطريق لان الامبيسيات ما تشتغل ولا اذاعة الكويت تصير صافية ولا احدن ابد ،، طالع تسني يتيم . وتكلمت نوال مع الدكتورة حنان عن القبلية والمناطقية وقعدت تسبنا ( وجه ماكل قطعة خبز تميس يابسه اكبر من خشته وشقت برطمه ) كل النقاش وهي تقول: ” اذكر وإنا صغار يقولو ليا يالحجازية وانا ارد عليهم يالشروق أكالت المرقوق ” وهي تضحك هي والدكتوره بحكم ان كلهم من الحجاز ( مازال الوجه اللي تو يصب دم ) ،، وشذا بطت تسبدي .
المهم نرجع لمحورنا اللي انحرفت عنه بقوه ،، اتصل واحد من جده وسال العقيد عن دوار في جده وان فيه زحمه ومدري وشو ،، كله تمام لان الزحمه في كل العالم ،وكله تمام لان كل تصريفات المسؤلين عندنا انه راح يناقش موضوع هذه المشكلة وسيتم حلها باذن الله ( ومت يا ابو صابر الين تشوف عوشزه مخضره ) لكن اللي اوب تمام واللي لفت انتباهي انه قال انه تم تشكيل لجنه من امانة جدة ومن وزارة النقل ومن مرور جدة وان هذه اللجنة تقرر العديد من القرارات والمدري وشو .. طيب الحين يا جماعة كل ما (طق) عود عود اول شي مطلوب لحل هذه (الطقة ) لا بد من تشكيل لجنة ..
طيب نرجع لجدة الحين وش دخل وزارة النقل في شوارع وسط مدينة وهذه مسئولية البلدية او الامانة ،، طيب الامانة وش عليها من الزحمة واللي اوب زحمه هي المفروض تنفذ اللي يقوله لها المرور ما لها دخل تقرر اكلف ما عليها انها تجيب الرصّاصَه وتسوي لنا مطبات وتغثنا والا على بالها فاهمة وتسوي شي وتشيله بعد يومين مثل الرصيف اللي بغت تسويه امانة الرياض قدام جامعة الملك سعود يقالك بيفك ازمة ما درو ان دربات الروس من اللي يسوقون والا الشوارع ما عمرها قالت شي ..
طيب الحين في دوائرنا الحكومية وفي كل قراراتنا من أعلى منصب الى تكليف بمهمة مراقبة العمالة كلها لازم تصير عن طريق لجنة ،، طيب شي حلو هنا يطبق وأمرهم شورى بينهم ،، لكن عاد مصخت ،، صار فيه بيروقراطية وصار فيه روتين، ما لقاها الا اعضاء اللجنة ماكلينها باردة مبردة والقرارات معروفة من زمان من اول ما صارت المشكلة ،، انا ودي اوريكم تقارير بعض اللجان تحس انهم أربعة شياب ( بـ –حكم- ان كل المراتب العليا هم شياب و-صنهم- ان كل الاعضاء لازم يصيرون من اصحاب القرارت ) وفي آخر شي ما ينفذ اللي قالوه او فندوه الا بعد ما يوافق صاحب الصلاحية العليا او من هم بحكم الادارة العليا المعنية .
مثال لأحد اللجان اللي ما لها سنع ، ان يتم تحويل مراقبة نظافة الحي السكاني الى سكان الحي ،، صعبه ؟؟ كل اللي عليهم انهم يوكلون واحد يتعاقد مع شركة للصيانة والنظافة وكل واحد يراقب جاره، سهله مرره ، تم تشكيل اكثر من لجنتين واخر شي تم التعاقد مع الشركة السابقة لصيانة الحي السكني وتسنك يا بو زيد ما رعيت بالبعارين ..
طيب شي ثاني اذا كتبت اللجنة محضر اجتماعهم عبارة عن ورقتين مثلا نص الصفحة الاولى كله عن نظرا لقرار معالي 000 بتشكيل لجنة للنظر في 000 شرحا على خطاب 000 المحال من ادارة 00 .. ترا قسم بالله ساعة كنك قاعد تقرا مرسوم ملكي،، ونظر للمرسوم الملكي رقم وتاريخ وبالنظر الى نظام الحكم الصادر برقم وتاريخ ،، ياخي هذا الملك وأصدر مرسوم ملكي يعني لازم تشغلون مذيع الاخبار بكل هالارقام المفروض مرسوم ملكي الملك يقول زينوا كذا وقضينا يعني تتوقعون بيجي احد بيقول لا غلط على الملك خخخخخخ ( وجه يناظر سليمان العيسى )
تصبحون في بيوتكم مو في ابوزعبل (f)
اللهجة اليوم مبدع فيها،، كله من لؤلؤ