تدوينه نفسيه باللهجه العاميه
بعد ما طلعت من الدوام أمس ولاني مشتهي بيتزا ،، مدري وش جاني هاليومين بوهتي بوهة ايطالي مغير اكل بيتزا والا مكرونه ،، على طاري المكرونه هي وش تصنع منه ؟
عاد نصيت بيتزا انن لان عندهم عرض بطل انك تشتري وحده ويعطونك الثانية ببلاش . وصلت لهم ولاهم ما بعد فتحوا من عقب الصلاة، من تالي كني بادي الين في تسكير المحلات وقت الصلاة مدري عني تسني باصير علماني ..
المهم تعرفون بعد الدوام الواحد يصير كاشخ صح يصير مقصر وتعبان شوي ،، لكن يظل هندامه نظيف ومأنتك ، وكانت فيه وحده في طرف السيب (<< خخخخ السيب يا قدمي ذكرت الخطه وشلقة البنات اللي يلعبون في السيب اللي ورا والحن يالعيلان مغير نجي طايرين بالسياكل نطير حصاهم وأغييه أغييه فتتح خخخخخ ) جت الين وصلتني يوم قربت حسيت انها قرت المعوذات من الروعه ،، شايفتني من بعيد نظيف ولابس ثوب كبك وصاك الغالوقه وكنادر تلامع ما درت ان هالكشخه على خشتي خخخخخ ، وهي شكلها بعد تحتري احد هالمحلات تفتح ( << ما قلت لكم اني بادي الين :$ )
وانا متسند على الجدار واناظر ذا البنت وهي يا رايحه ياجايه وذاك الجيب اللي يارايح يا مأشر بالجوال ،، والمشكله واضح انهم يبون يرقمون بعض بغيت اروح لراعي الجيب اقول له كم رقمك واعطيه البنت بدال ما يروح يديور ويتعب حاله المسيكين والبنت بعد يارفعه الشنطه يا مزينتن طرحتها خربت برستيجها وبس.
وانا اتابع المشهد الدرامي ( وقاعد ابني سيناريو يصلح اكمل به فيلمي او لا << ناوي يشارك في مسابقة جده :$ ) << احس بعض الناس بيقولون ترفق خخخخخخخ مثل مسابقة القصة في نادي الرياض الادبي هاه ههههههه.
جاء واحد وانا منسجم مع الصيع وسلم علي ،، اول ما طرى على بالي يوم شفته قلت شكله من اليمن وجاي تهريب وضاع جوازه واصلا ما معه فلوس وكانوا جماعته واعدينه يفتحون له محل بنشر بس سحبوا عليه << خخخخخخ ما زال يفكر في السيناريو هههههههه ،، المهم اول كلمه قالها لي بعد السلام ( الدنيا مشاكل ) قلت في نفسي افا مهيب طراره شكل الرجال مثل اللي لو توقف في سرا عند خباز تميس جاء ينغزك (كم بتشتري 
) على طول حسبتها في مخي قلت ارد عليه والا ابتسم في وجهه ويفهمها ويروح لكن خفت انه مضيع الطاسه ومهنا دبره وما يعرف وش معنى التبوسم ويحسبني اضحك عليه لانه مهبول! فقررت بما ان البيتزا ما بعد فتح خل اسولف معه ، مع ان ودي صراحه ما يفوتني شي واشوف وش سوا راعي الجيب رقم البنت او لا خخخخخخخ.
قلت له: تحتاج لصبر ، قال : ياخي تعبت مليت من كل شي ! حسيت انه بيقول ما تخبر لي حبوب قلت اكيد انه يحسبني الحين بياع والا شي لا سمح الله ،، بس قلت لو اني بياع كان قال قبل ما يسلم: عطه خير ، الا كانهم غيروها وخلوها الدنيا مشاكل او ان عطه خير للحشيش والدنيا مشاكل للحبوب او الهيروين ،، بس ياخي انا شكلي مرتب لو انه عقب المغرب وتوني قايم من النوم ولابس قميص وخشتي منعفطه وعيوني مبققه تقول عبدالعزيز المسلم في مسرحيه البيت المسكون كان يمكن.
المشكله اني توهقت مدري وش ارد ، تخيل توقف واحد في الشارع ما تعرفه ولاهم يحزنون تقول انا مليت ! يعني وش تبيني اسوي لك ، عاد ملامح وجهي الحين كلها علامة تعجب يعني وش تبي ، قلت له: عليك بالدعاء ربي ما يخلي احد يطلبه ويدعيه الا يستجيب له، وبدت يدي تتحرك عشان اطلع جوالي واظنه هو يحسبني اني كنت ناوي اطلع البوك بعد هالمقدمه عشان اعطيه دراهم وقال: لا تحسب مشاكلي انا ماليه ،، تعرف سوق الاسهم والضغوط النفسيه انا مليت نفسيا جاني شي ما اتحمله ومدري ايش ،، الصدق الصدق كان شعره ابيض مثل اللي نايم في الصمان وقام حزة الفجر ولقى قدامه غوريلا، يعني ما فيه امل يتوقع ان غوريلا بيجي للصمان ، يعني هو حاسبها على عقرب، قامّه ( < ثعبان )، ان خربها مرره جت على ذيب او ضبعه لكن غوريلا ،، تخيلوا الخوف << هههههههههههههههه انا بخاف من الكلب يطلع لي اسد .
قلت له: مشاكل اجتماعيه قال: ايووه عليك نور تعبت مرره ياخي كل شي اجتمع علي ،، عاد بما اني كل تو وانا ابني سيناريو، هالمشكله وشي الا باشوف وشي جيت باسئله لكن حسيت انها احراج ، مع انه هو اللي خاش في عيني وتخيلت ان المشكله فيها بنات << بحكم البنت اللي تو في أتلى السيب، تفكيري ضيق خخخخخخخخخ ،، لا لا من جد حسيت انها طلاق وعيلان او ورثه ، ترا ما احطها في ذمتي هذا اللي اتخيله .
عاد الحين جت لعبتي ، يوسف يحب يتفلسف ولقى واحد يسمعه ههههههههه قلت : شف ما فيه انسان عايش لحاله لازم هالدنيا تمر على كل واحد وياخذ نصيبه سعاده او حزن قال : كل تفكيري في هالمشكله صرت مثل المجنون قلت له: رحت لدكتور نفسي؟ ( عابره اسوي لكم دعايه خخخخ ) قال ياخي الدكتور بيعطيني حبوب مهدئة وبس ما راح ينفعني ، بالنسبة لي ما توقعت رده كذا كنت احسبه بيقول شايفني مهبول.
قلت: يمكن هالسبب اللي خلاك تمرض وتجيك الكآبة انك ما لقيت احد تتكلم له عن مشاكلك، يعني انت الآن تحس انك وحيد ما فيه احد معك لازم تلقى احد تفضفض الدكتور مو شرط يعطيك دواء يمكن يكون علاجك انك تتكلم ، قال: ما راح احد يقدر يساعدني ، قلت : مو شرط يساعدك يكفي انه يقدر يسمعك ، قال: ياخي انا نادم على شي فات ،، انا فرحت يوم صار هذا في الماضي مو في الوقت الحالي او يعيشه الحين .
قلت : افهم من مشكلتك انها في الماضي واللي انت تعيشه الحين كله من تبعاتها. قال: يا سلام عليك ايوه كذا ، قلت : بالعربي انت تعيش الى الحين في الماضي ، ما زال حاجز الذكرى القديمه هي تمنعك تعيش حياتك اليوم ، انت ما زلت متعلق بالماضي أيا كانت المشكله ومهما كان حجمها ، لازم تتجاوز هالحاجز لازم ، قال: كيف اتجاوزه وانا حياتي إعتمدت على ذاك الوقت حياتي وقفت هناك ، قلت له : شف يا خي كل واحد عنده مشاكل واللي عايش بدون مشاكل هذا كذاب ، لكن اللي قدر يتجاوزها هو اللي يعيش بسعاده عندك انا مثلا توفت امي وجاني الخبر بطريقه مثل الصدمه يعني تفاجات تفاجأ غير طبيعي وطريقة نقل الخبر كانت سيئه جدا ، ولهالسبب توقفت حياتي كلها خلااص جتني ايام معد ابي شي من الدنيا ، لكن بعد ما فكرت لقيت لي طريقة اتجاوزه منها اني صرت اكتب يومياتي مع امي وصرت اعتبرها ذكريات سعيده والحل هذا اوب انا اللي لقيته هذا لقاه لي عمي ( للمعلوميه فقط، رد علي في احد خواطري قال: اول كنت اعتقد ان الحزين هو اللي ماتت امه وما شافها مثل خالد او تميم او بدر ( << كلهم ماتت أمهاتهم وما كملوا السنه، عمي وولد عمتي واخوي بالترتيب ) ، لكن الحين عرفت ان الحزين هو اللي عاش بسعاده وفجأه فقد السعاده ، إحزن يا يوسف لكن تذكر انها ذكريات جميله عشتها بسعاده، فيه شي تذكره حلو ولو فقده مر) ولقيت لي حل اني اتجاوز الوهم اللي كنت عايشه على اني ما اقدر اعيش بدون امي ( وراح اكتب الموضوع اللي حفزت نفسي عن طريقه لتجاوز هالحاجز قريبا ) ، وكان هذا كله من تبعات الخبر اللي جاني فجاه ، وانت لازم تلاقي طريق لخروجك من ماضيك ممكن انت ما تعرف لأنك أساسا ما تدور حلول، لكن ممكن احد ثاني يعرف ممكن الدكتور النفسي يعرف وهذا اساسا اختصاصه . وضربت له مثال ( ممكن افرد له تدوينه لحاله) .
بعدها فتحو المطعم ولقيت راعي الجيب وقف عند كنتاكي والبنت مدري وين راحت والرجال هذا شكرني وراح ، كان يصغي بطريقة عجيبه تجبرني على الاستمرار في الكلام مع اني اعتبر شخص مستمع اكثر من متكلم.
الله يستر عليه ويهون عليه ويساعده في مصيبته . شكلي اليوم باروح لنفس المكان يمكن القاه واعزمه على الغداء .
كونو مطمئنين فالحياة ليست ماضي، فالماضي مضى ورحل، وليست مستقبل لأن المشتقبل مكتوب في الجبين لن تغيره، إن الحياة هي هذه اللحظه كيف ستعيشها ، القرار بيدك.
ما يستفاد من القصه ان دومنيز بيتزا ازين ولو خخخخخخخخخخ .
اكتشفت اني فاشل في الالوان
12 عدد التعليقات
