حبري ،،

اليوم بأكتب باللهجة المحلية

خلص رمضان وخلص العيد ،، تو الواحد يتواسى وصارت أشياء كثيرة الواحد وده يعلق عليها ،،

أول شي في رمضان تصدقون أن الواحد ينتفخ ثلاث كيلو ،، أنا خلال ايام العطلة بس صار الثوب ضيق علي ،، جت العطلة ولبست قميص ومغير فنك في اللقيمات والسمبوسه الين جاء العيد يوم جيت اتعيد وبالبس ثوبي اللي خبري فصرت في الثوب مبعج في كل شبر طالع لي طلع ،، أشوا انهم ما يضحون بي كان انواع الجوايا ،، صرت كني ليلى علوي  ،، الا غصب أبي أرقص ياهي دخبجه بعد ..

النشاط اللي كنت اكرف فيه في رمضان هو صلاة التراويح والقيام والبافي تسدح ،، عاد يا سبحان الله فيه ناس اتوقع تفطر على جيف ،، اللهم لا شماته بس والله صلى واحد جنبي اعوذ بالله اذا التفت في التسليمه وصار وجهه مقابلني تحس ببلكة تلزخ وجهك من قوة الريحه وتغمض غصب من نشاط في هالريحه خياااااااس مسيكين مدري هي غيره او مفطر على فول ،، يا جماعة الربع اذا بغيت تتنفس ما تحس انك تتنفس .. انا متاكد ان هالضعيف ناشبة قطعة تميس في خشته مربصة في توت ملحقها بشلايخ ثوم .. كان اذا جاء التشهد اقول يارب يارب التفت القاها قايم للركعه الاولى .. فيه اختراع اسمه حلاو بولو ..

واذا قعدنا نصلي يجونك ناس سبحان الله  من يوم يسلم وهو ملتفت يناظر وراء ؟. لنفرض انه يدور ولده يمكن صلى او ما صلى لكن من قوة التفاته انه حول ما يقعد في سجك .. مره صلى جنبي من كثر ما يلتفت وهو قدامي حفظت وجهه   ذاك اليوم سميت روحي  الوجه الخفي ما خليته يشوف وجهي صرت منزل شماغي وماده كيلو قدام عشان اذا التفت ما يشوف الا شي احمر ،، تدرون وش سوا ؟؟ طل في وجهي !!!!! مد يديه ووجهه لقدام كنه بيقوم مثل الشياب ومد راسه لجهتي الين طل في وجهي وعلى طول ناظر اللي جنبي على اليسار اهم شي شافني ،، ياجماعه انا اول ما اسلم اشوفه وهو يلتفت فكرت كذا نخليه رادار والله ياهو يلتفت تقول كنه بومه شايفه قباس يطير وراها وما تدري وينه ،، اتوقع اتوقع والعلم عند الله لو ان ما جنبه فخوذ ترده كان التفت مرره وصار يناظر السبوره من ورا من قوة التفاته تصقع فخوذه بفخوذ اللي جنبه فيدري ان هذا اخر مجال له فيرجع ريتيرن للجهه الثانيه بسرعه ،، وصار ظهره كنه سست جمس تتبرم على كيفه .. وأكثر شي ينبسط فيه اذا صار اللي قدامه يتلفت مثله تدرون ليه ؟. لانه يشوفه ويعرف منهو ،، ما اقول الا اللهم قاصرنا وقاصرهم بالاحسان بس ..

أفطر عندنا يوم امام لاحد المساجد في احد القرى الانجليزية .. وكانو شارطين عليه هالسنه انه يختم القران بهم .. وكان يمس بهم ،، يعني الناس في المساجد الثانيه  توصل للجزء الثالث هو منتصف في الجزء الخامس ،، تحسون انه طاير ،، عاااد يقول اول يوم قيام يوم جت حول الساعه ثلاث ونص قال واحد من الشيبان اللي وراه للي جنبه الظاهر ان هالمطوع بيخلينا نتسحر هنا ؟. قال اللي جنبه وهو رافع صوته عشان يسمعه الامام : الله يستر تطلع الشمس ثمين بكره نفطر عنده كلنا ،، قال لنا عاد الامام ما بقى الا تسليمه وحده اللي هي الوتر وانا اللي امس بهم الين الساعه اربع ،، عاد ابوي قال له حرام عليك بيدعون عليك هالبدو ،، قال ما يبون الاجر خلهم عشان السنه الجايه اذا قلت باصلي بكم قالو لا من العام ورجلينا توجعنا ..

على طاري الفطور ياخي لحد يتكلف في الفطور ترا تحرجون اللي بتفطرونهم مغير يفدغون في هالنعمه وبس الين تبنط كروشهم ،، واذا صار فيه عشاء لحد يكثر من الحركات على الفطور ترا الرجاجيل ما يتشرهون ويقولون وش حط ووش ما حط ..

ويتبع إن شاء الله

وأي خاش خرباش ما فهم علقوا عليه وانا أشرحه