حبري ،،

كنت باكتب الموضوع متفرقات بس حسيت انه رسمي شوي قلت خل نغير شوي .

• معرض الكتاب بيبدأ باتسر ( يعني يا رامز تراك محجوز يوم السبت او الاحد اللي ما عندك فيها دوام ) اكثر شي اعجبني الى الحين هو الندوة اللي بيسويها وزير الثقافة والاعلام ويقول بملء خشته وش تبون من الوزارة ؟ والتصريح الثاني لهيئة الامر بالمعروف يقولون اننا اوب مصادرين شي يعني املوا كراتينكم كتب ( كنهم يقولون هذي ديرتكم وانتم ابخص ) ، بس ترا ما عندي قوائم ولا نيب مسوي سواة خلق الله ، باروح ومعي مية ريال ، قاعد اكد على قراطيس انا ( وجه سليمان اخوي وهو مستغرب وشلون سجل ويلي الهدف ) وباخذ هالميه عن الحسوفه يمكن القى كتاب يشدني او شي ولا شيات . في بالي الحين فكرة اني اشتري كتب اطفال يعني بالدرزن وكل فترة اهدي كتاب لبزرانا، يعني اعطيهم كلهم مع بعض واطيرهم في العجه ، واشوف من اللي قرا القصه ، ثمين بعد شهر اعطي اللي قرا القصه قصة ثانيه واللي ما قراها اصطره كف << ابووك يالتربية خخخخ .
• على طاري الهيئة واللي يرحم والديكم رجعوا هيبتها تكفووون يالمسئولين والله عيب ، وعيب وشق جيب ، اللي قاعد يصير للهيئة ومن زود المهزله معد يدور معهم شرطي مثل اول سحبوا عليهم ، امس كنت في حي العليا وكنت عند مسجد ويمر جيب الهيئة : (الصلااااه الصلاااه يا عباد الله ،، الصلااااه ) والهنود من زود الفسقه قاعدين يكتبون على البي بي ، واطقع ما يشوفون الهيئة ، حتى من قلة الحياء الهندي قاعد يناظر جيب الهيئة وينغف دخلت لسوق حياة مول يوم الاربعاء ومروا افراد الهيئة والله انهم منزلين روسهم ويتكلمون بشويش : ( تستري يا اختي تستري ) ، نبي هيئة منول اذكر اول ما جيت للرياض قبل 10 سنين كانوا العمال يتوزون تحت السيارات وورا براميل الزباله ( وانتم بكرامه ) ، اول في الاسواق كانوا صوت افراد الهيئة يرعد في السوق وكانت اللي لبسها لك عليه تتوزى داخل المحلات. الله المستعان، يمكن عشان الهاله والجبروت اللي صار للهيئه في ذاك الوقت سبب لهم شوفة نفس وقلب عليهم الوضع .
• المرور وتطفيش خلق الله ، صرح امس مدير الامن العام وقال ترانا صيفنا ببرنامج ساهر مهوب رضاوة لكم لكن الامر اوب بيدينا ، وانا متاكد ان السالفه دخل فيها ( تسلم براطمها ) ووقف الموضوع يبي نسبه . ما علينا ! جاء مدير تطفيش قائدي المركبات وشفط جيوبهم وقال ( نحن مع فرد المرور في حر الصيف وبرد الشتاء ) طيب يا مدير مرور الرياض يالقصمنجي ( اول شي تراني اعرف اخوك اللي اكبر منك اخليه يقنعك ) ياخي ارحمنا من التفاتيش وقلة الحياء ، الحين معيفين من زحمة السيارات ودفاشة السواويق يجينا انجليزي ماله شغل الا يوقف ويقول حرك حرك ، الحين فيه خمسة تفاتيش كل يوم تبدا الساعة اربعه وتخلص الساعة عشر ، مالها فائدة ابد ، يعني لو الافراد اللي واقفين يفتشون وظفوا في مكان احسن كان اصرف ، تفتيش على الدائري الشمالي بين مخرج 2 ومخرج التخصصي ، تفتيش في طريق الجامعه بعد كبري ابوبكر ، تفتيش على طريق الملك فهد عند نادي الشباب ، تفتيش طريق المطار عند مخرج الثمامه ، تفتيش بعد مخرج انكاس ، كل يوم كل يوم في نفس المكان ياخي ملينا ، لا ويقولك اذا غيروا حطوه في السيد الثاني ، يعني انا مراعي شعور الضباط اللي يدخل القسم يلقى كل افراده يلعبون بلوت ويتتنون ، لان الحين الحوادث مباشرة الحوادث ماسكتها شركة نجم ، والمرور السري يوقف التريلات ما تدخل طرق الرياض ، والاشارات زحمه لانها زحمه ، فما للضابط حل الا انه يوقف الافراد في حر الصيف وبرد الشتاء ويضايق خلق الله ويسبب زحمه على الزحمه الموجوده .
• يقولك ان في وزارة التربيه والتعليم تخبط لا صار ولا استوى ، وشلون انا اعلمكم ، الحين الصفوف الاوليه ما عندهم اختبارات ، يعني اخر اسبوعين معطلين ، ممتاز صدر تعميم لجميع المدارس ان جميع مدرسي الصفوف الاوليه ( ما عدى اللي لهم خدمه كبيره في الوزاره ) عليهم انهم يختاروا او يتم توجيهم لمدارس اخرى عشان يراقبون في الاختبارات ، وجت صجه من المدرسين ان الوزارة ما ترحمهم ، لكن المفاجاه ان يوم الاربعاء واخر يوم من الدراسة وقبل الاختبارات ، ومع ان اغلب المدارس وزعت شهادات الطلاب جاء تعميم من الوزارة يكنسل التعميم السابق ويقول ان المدرسين يرجعون يدرسون الصفوف الاوليه ويعوضون هالاسبوعين عن الاسبوعين اللي تم اخذها في اول السنة بسبب انفلونزا الخنازير، وعليهم التركيز على الطلاب الكسلانين ، يا عيني على وزارتنا وتربيتنا ، حكم ودرر تطلع منها ، يعني هالقرار المفروض صادر في بداية الفصل عشان يقدر المدرس يحط منهجه بشكل افضل بدال ما هو حاشر نفسه بسبة الاسبوعين اللي ضاعوا ، طبعا كل المدارس ما درست لان الطلاب ما جوا للمدرسه لانهم استلموا شهاداتهم ونجحوا ، فالتكرار يعلم الحمار اللي في وزارة التربية والتعليم اللي قاعد يلعب بمدرسينا وطلابنا . أ.هـ
• في الوقت الحالي افضل مكان تداوم فيه ويعتبر ارقى من سابك وارامكوا هو وزارة التعليم العالي، عندها ميزانية مفتوحة واللي ما يستفيد منها يعتبر مجرم في حقه وحق اهله ، اجل بالله عليكم واحد خلال سنه جاه انتدابات ودورات بما قيمته 300 الف ريال ، المشكله انه ما يروح ويعتبر نفسه في اجازه بغض النظر عن انها حرام او حلال ، لكن وشذا التسيب العظيم ؟؟ وشذا الامانه الموجوده لدى موظفي قسم التدريب ؟ يقالك واحد تزوج وكان في جامعة الامام وكثرة عليه الديون ، نصح واحد انه ينقل للوزارة ، نقل للوزارة ما خلصت السنه الا هو ماخذ الثانيه ، ( هذا اذا قالولك مد ماعون جيرانه واهله ، بس قله خذ خير ) .
• قريت خبر قبل شوي ( موقع العلامه البراك يحجب في السعوديه بعد فتواه ) يالله كم مقرري الحجب أغبياء لدرجة الهلاك ، من الممكن ان يكون كإعتبار كما نحجب لمتطرفي  الليبرالية سنحجب متشددي الاسلام ؟!!! بس من الواضح ان هذا له بعد عن رأي الحكومة في هذه الفتوى ،
• اسوأ شي في نظامنا السعودي ، انه يتم سن قوانين وتتم فعاليتها الين يمل الوزير او المسئول الاول عن متابعتها ثم يبرد الموظفين الصغار او تدخل فيها رشاوي ووسائط والله المستعان . عندكم مثال للصجات اللي صارت وشوفوا الحين حالنا:

• - الجوازات وكنا اول نتمنى نلقى واحد يجي يكسر الصبه الحين شوفوا وش كثر العمال اللي منثرين على مخرج خمسه وفي ام الحمام وحي الملك فهد ، وغيره من الاحياء << هذا اللي اشوف. يعني العمالة السائبة الحين اكثر من عدد الامراء . ياخي حينا صار يخوف مسجدنا مع انه جامع يمتلي خمس صفوف كلهم ابو بكس ، وكلهم اشوفهم الصبح موقفين عند كارفور ، وشذاااااا ما صارت . يا جوازات اعقلوا ومسكوهم والا ترا باعلم واخرب عليكم .
• - سعودة الخضار ، آآمنا بالله وقلنا السعوديين بيصيرون مخضرجيه، وكانت من اهم المناقشات في المجالس ايام بداية التطبيق هل انك تشتغل في محل خضار بتربح او لا ؟ المشكلة ان المحلات الكبيره الحين سيطرت على سوق الخضار هذا واحد، الحين اشوف في حي العقيق محل خذار فيه هندي له ثلاث سنين يعني معقوله ما بعد دروا عنه ؟ ما بعد احد شكاه ؟ على طاري شكاه شكلي بارفع ايميل لبلدية الشمال اقول لهم ان فيه محل مخالف << هههههههههههه ودي اصدق ان عندهم ايميل ؟ وودي اصدق ثانيه انهم بيسمعون كلامي حتى لو ارسل فاكس خخخخخخ .
• - ربط الحزام ، تذكرون اول ما بدى يطبق القرار كنا نشوف ضباط يوقفون عند الاشارات عشان يقولك لو سمحت اربط الحزام !!! الحين وش صار ؟ راحت وقفتهم ذيك الايام على الفاضي ؟ مساكين اوجعتهم رجولهم وكان فيه اشاعه تقول انه الفازلين خلص كله من الضباط يدهنون به رجليهم اول مره يوقفون او يسوون تمرين قاسي خخخخ .

كاتب هذا الموضوع لا يتحمل أي شي ينم عن سوء فهم من الشخص المقابل ، قلته وكتبته خلال فترة انتظار .

سبحانك اللهم وبحمدك استغفرك واتوب اليك .